Bienvenidos al marco de las Industrias Culturales y Creativas

Benvidos a ICC Week 2018

Marco de las Industrias culturales y Creativas

 

Calendario

Calendario ICC Week 2017
Manuel Baltar

Manuel Baltar

Presidente de la Deputación de Ourense


Presenta o encontro Manuel Baltar Blanco, Presidente da Deputación de Ourense. Graduado en Dereito pola Universidade de Santiago de Compostela en 1990, é funcionario do corpo superior da administración da Xunta de Galicia e xefe do servizo xurídico da mesma institución en Ourense. Inspirado por programas de desenvolvemento de países industrializados, acuñou o termo “provincia intelixente” e aposta por políticas innovadoras que leven a Ourense a desenvolver o seu potencial, a creatividade e o uso de ferramentas e competencias TIC, sen traizoar esa esencia rural e natural que fai de Ourense, unha provincia única e singular.

Vicepresidente de Paternalia, representante dos territorios termais europeos EHTTA, participou como relator na South Summit 2015 e representou a Ourense como único territorio europeo convidado como exemplo de  territorio innovador e xestión no Seminario Internacional Governança Metropolitana que se desenvolve na cidade brasileira de Curitiba.

Javier Mariscal

Javier Mariscal

Deseñador gráfico


Nacido en Valencia en 1950, a vida deste barcelonés de adopción é unha historia de amor co debuxo. Na cidade condal esperta á contracultura e dálle renda solta á súa etapa de debuxante de cómics  underground. En 1979 crea o logo Bar Cel Ona, que lle daría gran popularidade. Ao ano seguinte deseña o bar  Dúplex de Valencia en colaboración con Fernando Salas. Para este local proxecta unha das súas máis famosas pezas: o taburete dúplex, unha auténtica icona dos anos 80. Participa como deseñador de mobles na exposición Memphis, an International Style de Milán. En 1987 expón na Documenta de Kassel e no Centro Georges Pompidou de París. Tamén desenvolve varias coleccións de téxtil para Marieta e Tráfico de Modas e expón na sala Vinçon de Barcelona. Finalmente, en 1989 o seu personaxe Cobi é elixido como mascota dos Xogos Olímpicos de Barcelona de 1992.
A partir de entón crea o seu Estudio Mariscal e comeza a recibir grandes encargos nos que desprega o seu particular universo, rebosante de historietas, caricaturas, caligrafías cheas de humor, liñas  distorsionadas e trazos primixenios que buscan romper os límites. Mariscal mergúllase en todos os medios e atrévese con calquera disciplina artística ao seu alcance: grafista, paisaxista, pintor, escultor, ilustrador, animador, deseñador de mobiliario, interiorista… sen traizoar a súa identidade de debuxante. En 1999 recibe o Premio Nacional de Deseño. Exhíbense retrospectivas da súa obra no London Design  Museum e en Corea, e as súas ilustracións acaparan portadas e páxinas en The New Yorker, El País ou na xaponesa Apo.
Nos últimos anos, Javier Mariscal saíu novamente do plano para aventurarse no cinema de animación con Chico & Rita, xunto a Fernando Trueba, con quen gañou un Premio Goya e con quen actualmente está a colaborar nun novo proxecto.

María Grande

María Grande

Ilustradora, deseñadora gráfica e motion grapher


Tras graduarse como Técnico Superior en Gráfica Publicitaria en Ourense, a súa cidade natal, cursa a diplomatura de Deseño Dixital no Istituto Europeo di Design (IED) de Madrid. Comeza a traballar nunha produtora audiovisual como animadora, pero meses despois volve á escola como titora en Artes Visuais para máis tarde traballar no departamento Media Lab do IED e chegar a ser a responsable da imaxe audiovisual da empresa. Sempre combinou o seu traballo con diversos proxectos de deseño como freelance tanto en cartelería, como en imaxe corporativa, deseño de discos, videoclips, etc. A gran protagonista dos seus deseños é a ilustración. Gústalle reducir ao máximo os conceptos para expresar ideas coa mínima cantidade de recursos. O seu estilo aposta polos trazos simples, polas cores planas e pola utilización de ferramentas dixitais rudimentarias como o Paint.

Bárbara Ouka Leele

Bárbara Ouka Leele

Fotógrafa e deseñadora


Nada en Madrid, en 1957, de nena impresiónanlle tanto as cores da natureza no bosque de San Rafael como as pinceladas de El Greco. Estudou fotografía en  Photocentro, onde a mediados dos 70 estaban a fraguarse as tendencias artísticas en cernes.
Froito da súa dobre paixón pola fotografía e a pintura nace o seu estilo  personalísimo, que se plasmou en abundantes colaboracións de escenografía, fotografía, cartelería e deseño de vestiario nos campos do teatro, a danza, a ópera e o cinema. Na súa traxectoria atesoura numerosos premios, entre eles o Premio Nacional de Fotografía (2005). Creadora polifacética, tamén se aventurou no mundo da escultura en vidro e na dramaturxia, e publicou varios libros de poesía e a obra en prosa Axis  mundi e outros relatos.
Viviu en Barcelona, Madrid, Nova York, México e París e as súas experiencias vitais e a súa procura das orixes reflíctense na súa obra. Participou nun gran número de exposicións en distintos lugares do mundo, coas que alcanzou unha gran repercusión. En 2008 foi distinguida coa Medalla de Honor na XI Bienal Internacional do Cairo e en 2010, unha creación súa foi seleccionada na Bienal de Shangai para a sección de gran formato.
Así mesmo, a súa obra ten sido obxecto de monográficos audiovisuais como La mirada de Ouka Leele, finalista na categoría de mellor longametraxe documental nos Premios Goya de 2010. Ela mesma se puxo tras as cámaras para rodar a curta Pour  quoi? sobre o relato de Caddy Adzuba. Tamén foi retratada por  Miquel Barceló. Desde 2014 é xurado das artes no Premio Princesa de Asturias.

Paco Clavel

Paco Clavel

Artista e axitador cultural


O innato axitador cultural Paco Clavel ten organizado ao longo da súa carreira exposicións, concertos e eventos de diversa índole, nos que sempre brillaron con luz propia a súa particular estética e o seu sentido do humor. Ademais, a singular personalidade deste artista, tan querida polo público español, ten servido de inspiración a músicos, pintores, fotógrafos, deseñadores de moda e cineastas.
Nos anos 80, xunto con Luis del Campo, forma o grupo Bob Destiny & Clavel y Jazmín, que desenvolve o estilo musical chamado “guarripop” ou “cutreLux”, caracterizado por unha estética rechamante impulsada pola súa inimitable personalidade. Co grupo ou en solitario, Paco realiza infinidade de aparicións en televisión e actuacións en directo por todo o territorio español. No estranxeiro destaca a súa actuación no Baile de la Rosa, organizado pola familia real de Mónaco, que en 2008 estivo dedicado á Movida Madrileña. A súa actividade radiofónica está especialmente vinculada a Radio Nacional de España, onde participou en programas como El Guirigay ou Extravaganza. A isto hai que engadir o seu traballo como DJ en numerosos eventos como o  World Pride Madrid 2017, o espazo Matadero-Madrid ou o festival de música Sonorama.

Juan Sánchez

Juan Sánchez

Documentalista, comisario cultural


Ao longo da súa carreira desenvolveu o seu traballo como documentalista en medios audiovisuais e programas como Queridos Cómicos e Otras Miradas, ou nas cintas ¿Quién fue Pilar Miró? (2011), Elio Berhanyer, maestro del diseño (2013), Con la pata quebrada (2013) e Manda huevos (2016).
Ademais, tamén dirixiu o documental Moda y cine para o Museo del Traje de Madrid, traballou cos selos discográficos  Quartet Records e Lemuria Music na edición de diversos discos de música cinematográfica, realizou varias colaboracións para as publicacións do Festival Internacional de Cinema de San Sebastián e escribiu artigos sobre cinema para as revistas  Exhumed Movies, Candy Magazine e Simply ademais de editar os libros Varietés (2015), con Rafael Doctor, e Antoloxía Party (2017), con Valeria Vegas.

Entre 1995 e 2012 colaborou co compositor  Bernardo Bonezzi e desde 1993 realizou distintos proxectos xunto ao deseñador gráfico e fotógrafo Juan  Gatti.

Desde 2013 colabora con Paco Clavel en diversas exposicións centradas na música popular española.

MORGAN


En 2015, Morgan entra no estudo La Cabaña de Madrid para gravar o seu primeiro álbum,  North, que auto-producen e propóñense distribuír eles mesmos. O disco ve a luz ao ano seguinte, e desde entón o grupo inicia unha xira promocional coa que percorren lugares e festivais como a Sala Sol, o Teatro Lara, Mad Cool, Sonorama, Gigante, Actual…ou o Palacio de los Deportes de Madrid. En 2017 a banda consolídase e conseguen coarse nas listas de “máis vendidos”. A súa frenética actividade en vivo non se detén, e continúan gañando adeptos alí por onde pasan.
En marzo de 2018 sacan o seu segundo álbum, AIR, que marca o inicio dunha terceira etapa na curta pero intensa vida deste grupo, e que nos presentarán nesta Ourense # ICCWeek18.

Carmela Crescenzi

Carmela Crescenzi

Arquitecta e profesora da Universidade de Florencia


Graduada en Arquitectura e doutora en Filosofía pola Universidade de  Florencia, é Profesora Asociada no Departamento de Arquitectura da mesma universidade. Desde 2006 coordina e promove conferencias e exposicións internacionais nos seguintes ámbitos: lectura e análise xeométrica da arquitectura antiga e contemporánea, estudo arquitectónico ambiental (tradicional e TIC) e sitios arqueolóxicos con especial atención ao coñecemento e á promoción do patrimonio cultural e innovacións dixitais no campo do Patrimonio Cultural. En 2009 foi directora do proxecto europeo Patrimonio cultural rupestre en el área circum-mediterránea. Identidad común nueva perspectiva, CRHIMA-cinp (Programa Cultura – Dirección Xeral de Educación e Cultura 2007-2013). Desde 2010 ata 2012, coordinou e foi responsable da investigación e a promoción do mesmo proxecto a nivel nacional e internacional. En 2012 participou como responsable no proxecto Representación para el conocimiento, la preservación y la mejora del hábitat rupestre mediterráneo ( PRIN 2010, Período 2013 – 2015). Desde 2013 ata 2016, coordinou o traballo de investigación  RU e as súas actividades nacionais e internacionais.

Jorge López Quiroga

Jorge López Quiroga

Profesor de Arqueoloxía na Universidade Autónoma de Madrid


Doutor en Xeografía e Historia (Santiago de Compostela) e Historia Medieval (París- Sorbona). Desenvolve o seu labor docente e investigadora na Universidade Autónoma de Madrid. Antigo membro da Casa de Velázquez e bolseiro da Fundación Alexander von Humboldt, foi profesor convidado en diversas universidades europeas e americanas, director entre 2004 e 2008 da Misión Arqueológica Española en Conimbriga (Portugal), e Profesor Asociado na Universidade Federal de Río de Janeiro. Ademais, é membro da Sociedade Nacional de Anticuarios de Francia. Desde 2002, unha das súas principais liñas de investigación céntrase no estudo dos procesos de transición entre a Antigüidade Tardía e a Alta Idade Media en Occidente a partir de tres vectores explicativos: o poblamento, o mundo funerario e a cristianización. Foi, ademais, comisario da exposición In Tempore Sueborum. O tempo dos Suevos na Gallaecia (411-585). O primeiro reino medieval de Occidente.

Domenico Caragnano

Domenico Caragnano

Director do Museo do Territorio de Palagianello, Italia


Domenico  Caragnano naceu na localidade de Palagianello, no sur de Italia, en 1962. En 1988 licenciouse en Letras na Universidade de Bari, e en 1995 especializouse en Arqueoloxía Tardo Antiga e Medieval na Universidade de  Basilicata. É socio do Istituto di Storia Patria per la Puglia e desenvolveu catalogacións para a superintendencia dos bens monumentais desta rexión. Tamén participou en escavacións organizadas pola Universidade de Basilicata e a Universidade de Salento e na escavación de Hierápolis, en Turquía, país no que segue a traballar en misións científicas na área da Capadocia. Ademais, ten realizado numerosas colaboracións con universidades italianas e estranxeiras. Participou en numerosas convencións internacionais sobre a vida en covas, en particular dentro do proxecto CRHIMA – CINP: Cultural Rupestrian Heritage the  Circum – Mediterranean Area. Ademais, publicou numerosos traballos sobre o fenómeno rupestre en Apulia e noutras rexións do Mediterráneo. Actualmente é Director do Museo do Territorio de Palagianello.

Antonio Giuliano Mastrangelo

Antonio Giuliano Mastrangelo

Profesor de Historia do Dereito da Universidade de Bari


Antonio Giuliano é avogado e, desde 2008, profesor na Cátedra de Historia do Dereito na Universidade de Bari, onde se adica aos estudos relacionados coa Alta Idade Media, con importantes contribucións na investigación dos usos e costumes matrimoniais en Terra de Otranto relacionados coa Lei Lombarda. Entre 1984 e 1994 colaborou en varios proxecto relacionados coa creación de parques naturais. Do 1985 a 2002 foi presidente do grupo arqueolóxico Espedito  Jacovelli de Massafra. En 2007 participa na rede INTERREG Caves Network. Desde 2003 é membro da Società di Storia Patria per la Puglia, así como inspector honorario de Massafra para os bens arqueolóxicos, pertencente á Superintendencia Arqueolóxica de Puglia. De 2010 a 2012 colaborou no Proxecto Comunitario CRHIMA- CINP. Publicou varios estudos e investigacións históricas tanto en volumes misceláneos do Grupo Archeo como nas coleccións do Departamento de Xónico da Universidade de Bari. Destaca entre os seus traballos o volume monográfico A condición xurídica da muller nas leis lombardas e matrimoniais na Terra de  Otranto.

Theodoros Ganetsos

Theodoros Ganetsos

Doutor en Física e profesor na Universidade do Pireo, Grecia


Doutor en Física pola Universidade de Atenas, é profesor no Departamento de Enxeñería de Automatización na Universidade de Ciencias Aplicadas do Pireo. Tamén exerce como Director do Laboratorio de Técnicas non-destrutivas na mesma universidade. Foi profesor visitante nas Universidades Bogazici (Turquía), Praga, Bratislava e Ryad (Arabia Saudita) e é membro da  International Field Emission Society ( IFES) e do Consello Editorial do International  Journal of Materials  and Chemistry. Foi autor de máis de dous centenares de artigos e relatorios en revistas científicas e congresos tanto nacionais como internacionais, e entre as súas liñas de investigación destaca o seu traballo na aplicación do feixes de ións en Arqueometría, de gran utilidade para a identificación da composición química dos materiais orgánicos e  inorgánicos.

Alexey Zhalov

Alexey Zhalov

Espeleólogo, escritor e profesor


Zhalov é profesor de Educación Física e de Espeleoloxía en  Bulgaria, labor que combinou cos cargos de Vice-Secretario Xeral da Federación Europea de  Espeleoloxía (2008-2013) e Presidente da Asociación Espeleolóxica dos Balcáns. Tamén é membro do Comité da Sociedade Búlgara de  Espeleoloxía e da Comisión de Formación e Bibliografía da Unión Espeleolóxica Internacional. Autor de oito libros e máis de trescentas publicacións sobre espeleoloxía, ten participado en expedicións espeleolóxicas en Rusia, Grecia, Serbia, España, Irán, Turquía e Tunes. Foi director de diversos proxectos e exploracións  espeleolóxicas en Albania, Cuba, China, Grecia,  Vietnam e Kósovo.

Nacho García Vega

Nacho García Vega

Músico e compositor


Guitarrista, cantante, compositor e icona da movida madrileña dos oitenta, liderou o grupo Nacha Pop xunto ao seu primo Antonio Vega (falecido en 2009) e a mediados dos noventa emprendeu unha carreira en solitario.
Quinto de seis irmáns, Nacho estudou no Liceo Francés e graduouse na Escola Universitaria de Informática da Universidade Politécnica de Madrid.
En 1977 formou xunto a Carlos Brooking e outros compañeiros de colexio o seu primeiro grupo de rock, semente de Nacha Pop: Uhu Helicopter, que versionaba temas de Led Zeppelin, Ramones ou Bob Marley, ademais de Steely Dan e moitos outros que foron influencias fundamentais para Nacho e definitorias do seu selo persoal como músico.
En 1978, xunto ao seu primo Antonio Vega e Carlos Brooking, crea Nacha Pop, un dos grupos bandeira do pop español dos anos 80.​ A banda publicou oito discos e realizou numerosas xiras entre 1980 e 1988.
Nacho escribiu para o grupo máis de trinta cancións, entre elas temas emblemáticos como Grité una Noche, número 1 dos 40 Principales no Nadal de 1985, Vístete ou Nadie Puede Parar, que marcarían as listas de éxitos en 1987 e 1988. Despedíronse nun concerto en Madrid tras un baño de multitudes en México  DF na sala Jácara titulado 80/88.
Agora, 30 anos despois do último disco da banda, acaba de voltar cun novo traballo: Efecto inmediato.

Luis Mendo

Luis Mendo

Músico e compositor


Luis Mendo (Madrid, 1949) é un compositor, músico e cantante español. Foi membro fundador do grupo Suburbano, xunto co seu inseparable amigo  Bernardo Fuster. Tamén foi coautor de populares cancións como La Puerta de Alcalá, ademais de acompañar en gravacións e concertos a artistas como Luis Eduardo Aute, Ana Belén, Pablo Guerrero, Luis Pastor, Joaquín Sabina ou Vainica Doble.

Iniciouse como músico autodidacta en grupos como Malasaña e acompañando a cantautores como Rizo Sánchez Ferlosio, Hilario Camacho ou Elisa Serna. En 1970, a través da súa amizade con Las Madres del Cordero, incorporouse ao grupo de teatro independente Tábano, co gallo das representacións de Castañuela 70 no Teatro de la Comedia de Madrid.
Veciño activo do madrileño barrio de Vallecas, foi alí onde callou con Fuster a creación da banda de folk rock Suburbano, cuxa presentación en público tivo lugar o 6 de maio de 1979, no local do colectivo cultural El Gayo Vallecano, continuador de Tábano. Como padriños tiveron ao produtor discográfico e creador do selo Guimbarda, Manuel Domínguez, e o cantautor portugués Fausto. Os seus compañeiros de aventura foron Lorenzo Solano, músico de jazz, Rafael Puertas, que viña da música clásica, e Michel Lacomba. No plano de xestión laboral desenvolve unha importante labor no SIM (Sindicato Independente de Músicos) e ademais é un dos vicepresidentes da  AIE (Sociedade de Artistas Intérpretes ou Executantes de España).

AIE

AIE

Artistas, Intérpretes y Ejecutantes


AIE é unha entidade que xestiona os dereitos de Propiedade Intelectual de artistas, intérpretes e executantes de música. Está radicada en España e ten sedes en Madrid, Barcelona e Sevilla. É unha sociedade colectiva, solidaria e democrática, sen ánimo de lucro. O seu ámbito de actuación é España, o resto de Europa, Latinoamérica e o Caribe, Estados Unidos, Asia e en todos os países e rexións onde se respectan e aplican os dereitos de Propiedade Intelectual dos artistas.
Nacida no 1989, ano no que é autorizada polo Ministerio de Cultura de España, conta xa con máis de 23.000 socios en España e representa, a  través da base de datos internacional de artistas creada por AIE e ás demáis entidades de xestión, o repertorio de máis de 800.000 artistas intérpretes ou  executantes, aos que fai efectivos os seus dereitos mediante procesos de repartición periódicos.
Opera baixo a tutela do Ministerio de Cultura, e comezou a funcionar ao amparo da Lei de Propiedade Intelectual de 1987, contida no Texto Refundido da Lei de Propiedade Intelectual, aprobado por Real Decreto Lexislativo 1/96, do 12 de abril, e modificado por última vez ata a data mediante a Lei 21/2014, do 4 de novembro.

O presidente da Sociedade de Artistas AIE é o director de orquestra e compositor Luis Cobos, quen tamén preside a Federación Ibero Latinoamericana de Artistas Intérpretes ou Executantes FILAIE, integrada pola práctica totalidade de Sociedades de Artistas de América Latina, Portugal e España.

Rober Bodegas e Alberto Casado

Rober Bodegas e Alberto Casado

Pantomima Full


Pantomima  Full é unha sucesión de sketches de entre cinco e dez minutos, nos que se presentan situacións absurdas levadas a cabo con normalidade conectadas polas pequenas diferenzas que manteñen entre eles os seus autores. Risas aseguradas neste  espectáculo de Alberto Casado e  Rober Bodegas, Pantomima  Full.

En Cracks que fixeron Crack poderás ver a Oliver  Atom contando como as drogas arruinaron a súa carreira a un psiquiatra que está peor que os seus pacientes. Tamén poderás ver Maxia, o espectáculo de maxia do mago  Magic, que é capaz de  teletransportarse pero con pouco estilo; a presentación do novo iPhone 8 e a captura do narco máis guapo.

Poderás ver a Teo (o de Teo vai á escola) e a  Wally (o de Onde está  Wally?) falar sobre o futuro nunha conversación do Banco Sabadell, a dous tíos xogando a pares ou  nones para ver quen empeza a dispararse nunha ruleta rusa, ou a un sobrevivente a un gran incendio queixándose porque facía demasiada calor.

En definitiva, unha chea de personaxes idiotas comportándose de maneira idiota en moitas situacións idiotas. Se che gusta a  idiotez, non dubides en ir velo.

Os nomes de Alberto Casado (Madrid, 1983) e  Rober Bodegas (Carballo, 1982) convertéronse nos últimos tempos nuns referentes da comedia “ online” . O que comezou como unha serie de vídeos para promocionar os seus espectáculos na Gran Vía madrileña, converteuse nun fenómeno de culto, no que miles de persoas se tronchan cada día. Arquetipos sutís e  tronchantes en vídeos curtos compartidos masivamente en Facebook, retratos  burlescos das novas tipoloxías sociais… nada máis, pero tampouco nada menos.

As vidas destes dous cómicos cruzáronse no mítico programa da Sexta Sé Lo Que Hicisteis…, e tras unha longa tempada de éxitos, continuaron coa experiencia de Solocomedia, un formato de comedia tamén na rede, onde seguían acompañados por Ángel Martín.

Rober e Alberto seguiron xuntos traballando como guionistas na comedia de Catro Gym Tony.

Raquel Córcoles

Raquel Córcoles

Moderna de Pueblo


Raquel Córcoles naceu en Reus en 1986. Cursou a carreira Publicidade, Xornalismo e Comunicación Audiovisual na Universitat Rovira i Virgili (Tarragona) e rematou os seus estudos en Madrid, licenciándose en Xornalismo na Universidade Rey Juan Carlos. En 2010 creou o blogue Moderna de Pueblo e despois de compaxinalo durante tres anos co seu traballo de creativa publicitaria, deixou esta última ocupación en 2012 para adicarse a tempo completo ao seu proxecto persoal, no que dirixe os contidos e traballa como guionista e ilustradora.

Moderna de Pueblo valeulle a Raquel Córcoles a bolsa Connecta’ t al còmic, grazas á cal puido publicar o seu primeiro libro, Soy de pueblo, que fixo coa axuda da deseñadora gráfica Marta Rabadán (1984, Cocentaina).

Despois de traballar case un ano nas revistas El Jueves e Cuore, fixo unha pausa para escribir o seu primeiro cómic en solitario Los capullos no regalan flores (2013,  Lumen), que vai pola 6ª edición con máis de 30.000 exemplares vendidos e foi publicado en Francia, Brasil, Portugal, Singapur e Malaisia.

A partir de 2013, incorpórase como guionista Carlos Carrero (1984, Madrid), con quen publica Cooltureta: la novela gráfica (2014,  Lumen), que vai pola 3ª edición. Raquel e Carlos seguen traballando diariamente no contido de modernadepueblo. com e colaborando en medios como Cuore, El País e GQ.

Juan Ramón Bonet

Juan Ramón Bonet

Humorista


Juanra  Bonet é un actor nado en Barcelona que se fixo popular ao practicar o intrusismo laboral. Traballou como reporteiro e presentador en Caiga Quién Caiga entre 2005 e 2008, e ninguén percibiu que non tiña a carreira de xornalismo. Un  halago para el, unha vergoña para o gremio. O programa morreu por causas naturais aos catro anos (en linguaxe televisiva iso é media vida) e  Juanra fichou por El Intermedio para substituír ao Gran  Wyoming os venres e festivos durante o 2009 e parte do 2010, pero el pensou que era  Wyoming o seu substituto de luns a xoves. Cando a edición do Intermedio dos venres deixou de emitirse, Bonet representou o monólogo Animales, de Ricky Gervais por toda España. Fíxoo durante dous anos porque o aprendeu de memoria. Puido compaxinar o espectáculo coa presentación do concurso de El Terrat Gafapastas en La2. Isto hai que dicilo porque non o viu ninguén. Tamén presentou o programa de radio El Mundo Today na Cadena Ser (www.elmundotoday.com). Isto hai que dicilo porque non o escoitou ninguén. Despois de moito tempo gañando pouco diñeiro, o banco convenceulle para presentar un concurso diario de televisión en Cuatro, Lo Sabe No Lo Sabe, desde o verán do 2012 ata decembro do 2013 (ou o resto da súa vida, se temos en conta as  redifusiones nas canles dixitais de Mediaset). Actualmente ameniza as tardes de Antena3 de luns a venres presentando ¡Boom!, un concurso para os que non queren ver  Pasapalabra.

Manuel de Lorenzo

Manuel de Lorenzo

Moderador


Manuel de Lorenzo (Ourense, 1981) é escritor e xornalista. No ámbito da prensa escrita, traballou como redactor e colaborou con diferentes medios de comunicación, tanto nacionais como autonómicos. No ámbito da comunicación audiovisual, traballou como guionista, realizou un programa de radio na Radio Galega e dirixiu un programa de televisión para a TVG. Na actualidade ten unha sección semanal no programa Galicia por Diante da Radio Galega e escribe para os xornais El Español, El Progreso e Diario de Pontevedra, así como para as revistas Jot Down Magazine e Jot Down Smart, publicada polo diario El País.

Cynthia Gálvez

Cynthia Gálvez

Enxeñeira e deseñadora gráfica


Cynthia comezou a súa carreira unindo as súas dúas paixóns, o deseño e a tecnoloxía, creando a súa propia ferramenta de realidade aumentada e impulsando un proxecto de innovación para persoas con necesidades educativas especiais. Como responsable de I+D nunha startup, desenvolveu un proxecto mediante realidade mixta con  HoloLens, obtendo o premio á Mellor App Española de XR 2017.
Actualmente traballa como freelance para diversas empresas. Gústalle coñecer a realidade das persoas, por iso a experiencia do cliente é un dos ámbitos que explora. Apoia outras iniciativas para dar visibilidade ás mulleres tecnólogas sendo organizadora do evento Women TechMaker Zaragoza e da comunidade Mulleres  Tech.

Sara Rodríguez

Sara Rodríguez

Avogada e Policy Manager


Licenciada en Dereito e Máster en Dereito Privado pola Universidade Complutense de Madrid. Desde 2014, cursou os estudos de Doutoramento en Dereito Mercantil na mesma universidade, cunha investigación centrada no Dereito da Competencia e as Plataformas Dixitais como mercados multilaterais.
Actualmente é manager de asuntos públicos e regulatorios en Adigital -a Asociación Española da Economía Dixital- e en Sharing España, o colectivo de empresas da economía colaborativa, baixo demanda e de acceso, que nace dentro de Adigital. Adicionalmente, é avogada en exercicio, prestando asesoría a empresas, startups e emprendedores, principalmente do sector da economía colaborativa; asesora estratéxica de GovUp, un policy lab de innovación e profesora de aspectos legais da economía dixital no MBA Negocio e Transformación Dixital da Universidade Europea de Valencia.

Luz Castro

Luz Castro

Directora de Imaxin Software


A traxectoria de Luz reflicte o seu dobre compromiso coa visibilización da lingua galega e as mulleres no eido das novas tecnoloxías. Ela mesma, como socia directora de Imaxin software, unha das empresas tecnolóxicas máis veteranas de Galicia, é un exemplo de xestión feminina.

Logo de fundar a Plataforma polo Galego na Informática, no 1994, foi Vicepresidenta da Mesa pola Normalización Lingüística entre o 2002-2004. Foi vicepresidenta de EGANET (Asociación de empresas galegas adicadas a internet e ás novas tecnoloxías), promotora da Lacon Network, impulsora de Startup Galicia e Vogal do Comité de Dirección do Cluster TIC.

No eido da investigación e a docencia, formou parte da Comisión de I+D+i da Unidade de Muller e Ciencia da Xunta de Galicia e tamén foi membro da Asociación de Mulleres Investigadoras e Tecnólogas de Galicia. Colaborou co equipo de investigacións do Laboratorio de Redes de Neuronas Artificiais e Sistemas Adaptativos do Departamento de Computación da UDC. Actualmente, é formadora no Máster de Marketing Dixital da USC e profesora interina na Facultade de Comunicación Audiovisual da Universidade da Coruña.

Está especializada no desenvolvemento de xogos educativos, produtos multimedia e gamificación, e dirixe a área de in|gaming de Imaxin.

@Chincheto77 & @Tonacho

Gamers e Youtubers


Este 2018,  ICCKIDS céntrase no mundo  gamer e youtuber, por petición dos seus usuarios, máis de 400 nenos e nenas que o ano pasado interacturaron nos talleres e nas charlas de tecnoloxía que se realizaron polos colexios e institutos da provincia de Ourense.
Deste xeito, contaremos nesta edición coa presenza de @Chincheto77 e @Tonacho, dous dos youtubers máis importantes de España, que ofrecerán unha charla sobre a influencia positiva que teñen o mundo  gamer e youtuber nos rapaces. O encontro terá lugar o venres 4 de maio a partir das 17:00 h no Centro Cultural Marcos Valcárcel.
@Chincheto77 e @Tonacho comezaron a publicar por afección, e por sorpresa atopáronse cunha audiencia fiel que os seguía. Pronto descubriron que podían converter a súa paixón nunha profesión coa que gañarse a vida. Agora, cada un deles conta con máis de 700.000 seguidores en YouTube, onde arrasan cos seus vídeos sobre Minecraft.
Malia que @Chincheto77 deixou atrás a adolescencia hai moitos anos, segue xogando a videoxogos e gozando deles como nos seus anos mozos:  Minecraft,  League  of Legends e  Heroes  of the Storm son tres dos títulos nos que ocupa o tempo cando senta diante do seu computador e pulsa o botón de gravar.
@Tonacho é un xogador habitual do Minecraft, e os seus vídeos contan con máis de 1.500.000 reproducións. Considera que o éxito das súas canles se debe a que ofrece un produto que é 100% entretemento. Tamén destaca a versatilidade da plataforma, en contraposición á televisión.
Estes dous youtubers, amigos entre si, son os artífices de Mundo Chiquito, unha serie sobre o videoxogo Minecraft, que con seis tempadas e medio milleiro de capítulos emitidos, é a miniserie de emisión dixital máis longa da historia. Os primeiros capítulos xa acumulan ao redor das 300.000 reproducións cada un.

Emojinarium

Emojinarium

Obradoiro para nenos e nenas


Que significan dous puntos e unha paréntese? Un sorriso.
Neste divertido taller impartido por María Grande, animadora e  motiongrapher apaixonada da ilustración, veremos como expresar emocións co menor número de trazos posibles. Analizaremos os emojis, a linguaxe universal das expresións e crearemos os nosos propios personaxes.

Gracia Querejeta

Gracia Querejeta

Directora e guionista de cine


Gracia é licenciada en Xeografía e Historia pola Universidade Complutense de Madrid. En 1987 coescribe e dirixe o seu primeiro traballo cinematográfico, Tres en la marca, curtametraxe galardoada co premio Teatro Arriaga no Festival de Bilbao. Desde entón traballou como axudante de montaxe, guionista e directora en numerosas producións. Ten realizado ata hoxe oito longametraxes de ficción cinematográficas –Una estación de paso (1992), El último viaje de Robert Rylands (1995), Cuando vuelvas a mi lado (1999),  Héctor (2004), Siete mesas de billar francés (2006), 15 años y un día (2013), Felices 140 (2015) e Ola de crímenes (2017)- e capítulos de series, como La adolescencia (1990), para a serie de TVE El hombre y la industria, e El partido del siglo, rodado en 1997 para a serie DiStefano emitida por Canal +. Tamén realizou documentais –El viaje del auga (1990), El trabajo de rodar (1993), Primarias (1998)- e producións audiovisuais encargadas por distintos organismos e institucións, como ExpoZaragoza ou o Ministerio de Igualdade. A súa obra foi recoñecida con numerosos galardóns en festivais como o de San Sebastián, Málaga, Valladolid, Vitoria, Berlín e Tokio, ademais de recibir varias candidaturas aos Goya e os premios de El Mundo e o Círculo de Escritores Cinematográficos. Tamén obtivo varios premios a toda a súa traxectoria, nos festivais de cinema de Huesca, Alacante e Valencia.

Nico Campos

Nico Campos

Presidente de AGAG


Presidente de AGAG, Asociación Sindical Galega de Guionistas. Ao longo da súa carreira profesional, Nico ten realizado todo tipo de proxectos como curtametraxes, documentais, videoclips e algún spot de televisión. Escribiu en series de ficción, realizou en directo concertos para xente coma Offspring, Bebo Valdés, Prodigy ou o Padre Jony. Os seus traballos expuxéronse en sitios como o CGAC, o MARCO ou o Círculo de Bellas Artes de Madrid. En televisión traballou no popular formato infantil dos anos 90 Xabarín Club e o programa dirixido á poboación xeral Vivir Aquí. Actualmente segue traballando en diversos proxectos.

Premio MUSA SGAE

Premio MUSA SGAE

Premio á excelencia creativa


O sostemento das Industrias Culturais e Creativas non sería posible sen a existencia de entidades de xestión de dereitos como a SGAE. Con este acto, desde ICC Week queremos destacar a importancia destes axentes, xunto aos creadores e os públicos, como os tres vértices do triángulo da industria cultural. A distinción entrégase a persoas cuxa labor deixou pegada nunha xeración de públicos, unha traxectoria que serviu de inspiración a outros creativos e animado a novos talentos.

Yosi Domínguez

Yosi Domínguez

Autor, compositor e guitarrista de Los Suaves


Yosi naceu, co nome de José Manuel Domínguez Álvarez, en Ourense, en 1948. En 1979 foi cofundador da banda de rock Los Suaves, xunto aos seus irmáns Charli e Xabier, baixista e batería do grupo respectivamente.

Yosi non é tan só un veterano vocalista, un consagrado guitarrista e un rockeiro indomable: é tamén un dos mellores letristas de España, o que lle valeu o sobrenome de “O Poeta” co que o coñecen moitos dos seus seguidores. E é que as súas composicións están impregnadas de temas universais como o amor, a perda, o día a día, a morte, a noite, as mulleres e o sabor da derrota, sempre cun ton de inextinguible melancolía. Co tempo, as súas letras refináronse aínda máis e alcanzaron un maior calado, enchéndose de recursos literarios e afondando en cuestións existenciais. Este ton máis escuro e intimista plásmase en discos coma se Si Yo Fuera Dios ou El Jardín de las Delicias. Ademais da letra, tamén creou a música de case todas as cancións da banda.
Agora, no ano das súas 70 primaveras, aínda se mantén nos escenarios e resístese a apagar a súa máquina de crear. Inspirou a xeracións enteiras de fans, e logrou converterse naquilo ao que moitos rockeiros aspiran: lenda viva.

SGAE

SGAE

Sociedad General de Autores y Editores


A historia da SGAE remóntase a finais do século  XIX, cando o sector musical e teatral en España estaba formado por tres grupos: os donos das salas nas que se interpretaban as obras, os autores das mesmas e os intermediarios entre ambos, é dicir, os editores.
Motivados polo recoñecemento dos Dereitos de Autor, tanto nun marco nacional (Lei de Propiedade Intelectual española de 1879) como internacional (Convenio de  Berna 1886), arraiga nos autores a idea da independencia e o asociacionismo para unha mellor protección dos seus dereitos. O 16 de xuño de 1899 fundan a Sociedad de Autores Españoles ( SAE).
En 1932 Federico Romero propón a disolución da  SAE e a creación de SGAE: Sociedad General de Autores de España, cuxo primeiro presidente foi Eduardo Marquina.
Actualmente, a sociedade representa a máis de 100.000 socios e xestiona un repertorio de máis de cinco millóns de obras rexistradas. Para ser socio da entidade hai que ter obra explotada publicamente en calquera medio. Entre os seus socios hai músicos, compositores, autores dramáticos, letristas,  arranxadores, guionistas de cinema, televisión e radio, autores de bandas sonoras, directores cinematográficos, realizadores audiovisuais, etc. Ademais, a sociedade ten acordos de reciprocidade con outras entidades similares establecidas no resto do mundo, polos cales estas explotan o repertorio da SGAE nos seus territorios a cambio de que a sociedade xestione os seus en España.

José M. Fernández Sastrón

José M. Fernández Sastrón

Presidente da SGAE


Experto en Dereito de Autor, compositor e produtor musical
Nado en Madrid, en 1959, José Miguel F. Sastrón é compositor de bandas sonoras para cinema, teatro, sintonías, series de televisión e especializado en música para publicidade. Colaborou coas principais axencias publicitarias españolas e multinacionais, sendo galardoado en 1986 co Premio á Mellor Banda Sonora do Festival Internacional de Cinema Publicitario de Cannes. En 1995 funda a compañía discográfica Pep’s Records, constituíndo a continuación as produtora Variedades Musicais, a través da cal realizará distintas producións para as máis importantes cadeas de TV, nacionais e internacionais.
En 2006 entrou a formar parte parte da creación da Asociación Nacional de Autores y Editores Musicales (ANAEM), ocupando a Vicepresidencia ata xuño do 2007, data na que se incorpora como parte da Xunta Directiva e Consello de Dirección da SGAE. En 2009 é nomeado membro do Comité Executivo do Consello Internacional de Creadores de Música (CIAM), órgano executivo de  CISAC (Confederación Internacional de Sociedades de Autores e Compositores). En 2012 é nomeado Vicepresidente da SGAE, e en abril do 2016 é nomeado Presidente da mesma entidade.
Como experto en Dereito de Autor e Propiedade Intelectual, ten participado en diferentes seminarios, xornadas, foros de debate e cursos universitarios, entre os que cabe destacar Jornadas por el Derecho a Seguir Creando, II Encuentro Internacional de Artistas, ou, en materia docente La Evolución de los Derechos de Autor en el Mundo Digital da Universidade Complutense.

MIKEL ERENTXUN


Este vasco nado en Venezuela e forxado nas filas de Duncan Dhu -grupo do que foi cofundador en 1984- é unha das voces máis finamente temperadas e veteranas do rock español. Comezou a súa aventura en solitario en 1992, e desde entón nos ten regalado seis álbums, ademais de realizar covers para nomes da talla de The Smiths ou Morrisey e de colaborar con grandes da escena internacional como Mark Gardener ou Robert Quine.
En maio de 2017, Mikel publicou o seu último traballo en solitario ata a data: El hombre sin sombra, o produto dun artista maduro e coñecedor dos seus propios rexistros. Seguindo a mellor tradición do pop-rock, a voz do vasco, acompañada da de Maika Makovski, chéganos envolta nunha instrumentación acústica con guitarras, vento e cordas. Este disco, minimalista e sinxelo, finalista nos Grammy Latinos de 2017 na categoría de mellor álbum de pop/rock, ratifica unha vez máis porqué este artista ocupa un lugar dourado na historia do pop rock español.

Marta Gómez

Marta Gómez

Xornalista e presentadora


Marta Gómez é licenciada en Xornalismo, Publicidade e Relacións Pública con másters de especialización en Documentais Cinematográficos e Redes Sociais. Traballa en medios de comunicación públicos e privados dende 1998, especializándose na última década en programas culturais. Actualmente leva a sección musical dos programas Zigzag e Eirado na TVG. Dous espazos que queren dar visibilidade a grupos galegos tanto emerxentes como consagrados, e dende onde se lle da cobertura a moitos dos eventos relacionados coa música que teñen lugar tanto en Galicia como no Norte de Portugal (WOMEX, Festival WOS, Nos Primavera Sound…).
É por isto testemuña do intenso e vital momento que está vivindo a escena musical do país, tanto a nivel creativo como pola multiplicación de colectivos e promotores que se moven dende a autoxestión ata a posta en marcha de proxectos de vocación internacional.

Carlota Álvarez Bassó

Carlota Álvarez Bassó

Departammento de Subdirección Artística do Museo Nacional Centro de Arte Reina Sofía


Desde hai máis de 25 anos ocupou cargos de dirección en diferentes institucións culturais españolas. Na última década foi Directora Xeral de Planeamento e Avaliación do Concello de Madrid, onde redactou o PECAM  2013-2020 (Plan Estratéxico de Cultura do Concello de Madrid). Desde xaneiro do 2013 ata xaneiro do 2018 foi directora do Centro de Creación Contemporáneo Matadero-Madrid, e actualmente traballa na Subdirección Artística do Museo Nacional Centro de Arte Reina Sofía, onde leva Proyectos Especiales.

Premios Rodolfo Prada


No marco da ICC Week terá lugar a entrega do premio Rodolfo Prada, un galardón dirixido a profesionais da xestión cultural. Trátase dunha iniciativa convocada pola Deputación de Ourense en colaboración coa asociación galega de profesionais da xestión cultural. O premio é unha homenaxe ao galeguista Rodolfo Prada, nacido en Os Peares e emigrado a Arxentina, onde foi o gran valedor de Castelao e un referente para toda a comunidade galega.

AGPXC

AGPXC

Asociación Galega de Profesionais da Xestión Cultural


A Asociación Galega de Profesionais da Xestión Cultural (AGPXC) nace en maio de 2008 como un espazo de encontro e reflexión, así como unha plataforma de representación profesional. Na actualidade, forma parte da Asociación unha representación ampla e plural, tanto do eido público como do privado. Entre os seus obxectivos destacan a representación e defensa dos intereses dos técnicos e xestores culturais da nosa comunidade, a facilitación aos socios de servizos de asesoría técnica e xurídica, a promoción da mellora das condicións para desenvolver a actividade dos xestores culturais, o reforzamento da figura do xestor cultural e a promoción do debate e o intercambio de experiencias en torno a temas relacionados co sector.

ESPOSA

ESPOSA


Mar Catarina (sintetizador), Cibrán Tenreiro (voz e batería), María Villamarín (voz e sintetizador) e Xacobe González (voz e guitarra), son os integrantes desta banda compostelá que se caracteriza por un son situado nalgún punto entre o brit-pop e o garage minimalista. Este é o particular estilo co que visten unhas letras, escritas en galego, que destilan emotividade e profundidade reflexiva. As súas cancións falan de personaxes con identidades en conflito e dúbidas existenciais do século XXI, nas que ás veces se mestura o plano real e o virtual, e que se fan eco de problemáticas que son a marca da súa xeración: o paro, a precariedade, a emigración, a dependencia económica ou a falta de apoios firmes nos que basear a súa identidade. A súa posta en escena, alegre e natural, pode facernos baixar a garda ante as tensións que latexan nos seus temas.

BIFANNAH

BIFANNAH


Bifannah son o resultado de mesturar a cadencia do moody garage dos 60 e a  tropicalia lisérxica do século XXI. A banda, formada en Vigo no outono de 2015 por Guille, Antía, Antón e Pablo, aséntase actualmente entre Londres e Madrid.
Cun EP autoproducido como carta de presentación, Bifannah entrou a formar parte de The John Colby Sect a principios de 2016. Ao longo dese ano puidemos velos no primeiro Barcelona Psych Nights, en León Es-Reacción, abrindo para Allah-Las en Madrid ou tocando xunto a Mystic Braves en Lisboa. En febreiro de 2017 gravaron o seu primeiro LP, Maresia, de novo en  Terraforma Studios. Este traballo, mesturado por Jasper Geluk en Tone Boutique, estudo no que traballaron músicos como Jacco  Garder ou Wild Honey, proporcionou unha nova dimensión á banda, unha evolución do seu son. Nos primeiros meses deste 2018, a banda levou o seu tropicalismo atlántico ata EEUU.

RUFUS T. FIREFLY

RUFUS T. FIREFLY


Esta banda, liderada por Víctor Cabezuelo e Julia Martín-Maestro, é xa, a pesar da mocidade dos seus compoñentes, considerada de culto dentro do panorama independente do noso país. Cunha irresistible enerxía e un son profundamente sofisticado, foxen do evidente e constrúen en cada produción e en cada directo un ambiente de maxia e rock con tendencias cara a unha  psicodelia pulcra e altamente adictiva.
Na Ourense #ICCWeek18 presentarán o seu último traballo, Magnolia, un alegato en defensa da arte, do amor e da natureza en forma de 10 cancións. Un disco arriscado e ambicioso, marcado en todo momento pola obsesión da banda por perfeccionar o seu son e a profundidade das súas texturas, sempre á marxe das modas e cun mesmo obxectivo na cabeza: crear unha obra única, o máis fermosa posible.

SILVIA SUPERSTAR

SILVIA SUPERSTAR


Silvia Superstar irrompeu na escena musical española a mediados dos 90 capitaneando o grupo The Killer Barbies. Daquilo quedaron 6 discos orixinais, milleiros de concertos por toda a península ibérica e varias xiras mundiais que lles levaron ata Xapón e EE.UU, facendo parada con actuacións xunto a  Iggy Pop e The Misfists entre outros artistas míticos.
Ademais de compoñer, cantar e actuar, Silvia ten unha ampla experiencia tras os pratos e as súas sesións cheas de soul, rock’ n’ roll, surf, pop e rock son lendarias. Na actualidade é Dj residente do seu bar El Fabuloso en Madrid e pica en innumerables salas e festas ao longo e ancho de España e Portugal.

ICC GAMERS

ICC GAMERS


ICC Gamers, –O punto de encontro dos amantes dos videoxogos na provincia de Ourense– é froito da colaboración entre a Deputación de Ourense, a Universidade de Vigo, R, Euskaltel, a ASEII, a Federación Galega de Automobilismo, Xogón Videoxogos e Mahou.

Con esta iniciativa, búscase afastar ao público da fenda dixital e posicionar á comunidade preto dun mercado que evoluciona a un ritmo vertixinoso.

ICC Gamers inclúe dúas actividades:

ICC Technium R Encounter, que comezará o día 3 de maio ás 18.00 horas e rematará o día 6 de maio a mesma hora, no Pavillón Universitario de Ourense.
A Lan Party, que contará con seis grandes torneos: FIFA 18, GT Sport, League Of Legends, Counter Strike Global Offensive, Hearthstone e Super Smash Bros Brawl, que se celebrarán ao longo da party. Haberá 4.000 euros en premios en torneos ou en outras actividades lúdicas dentro da party.

ENTRADAS PARA SÁBADO (GRADA)

ENTRADAS PARA TORNEO DE FIFA 18

ICC eSPORTS

ICC eSPORTS


Este apartado de xogos completarase coa “ICC eSports” que tamén se celebrará no Pavillón Universitario de Ourense, o día 5 de maio ás 10:00 horas ata o día 6 de maio ás 15:00 horas. Dentro desta celebración os torneos que se disputarán serán: FIFA 18, Clash Royale, e GT Sports.

” ICC e- sports”, unha actividade centrada nunha nova maneira de entender o deporte. Este tipo de competicións profesionais de videoxogos conta cunha industria totalmente profesionalizada en países como Estados Unidos, Corea do Sur, Alemaña, Francia ou Suecia.

O torneo de Clash Royale dividirase en dúas modalidades: unha delas será, o torneo Profesional invitacional por equipos no que se darán cita os mellores clubs a nivel nacional como Baskonia, Mad Lions, Wild Gaming, Arena Quesito ou X6tence, e no que se repartirán os seguintes premios: 2000€ para o primeiro equipo clasificado, 1000€ para o segundo e 300€ para o terceiro e o cuarto. Na modalidade individual, o primeiro clasificado levará 600 €, 300 € o segundo e 50 € o terceiro e o cuarto. O torneo de FIFA 18, no que participarán 64 persoas, ten un custe de entrada de 5 euros e os premios serán para o primeiro clasificado unha PlayStation 4, para o segundo clasificado un mando de PlayStation 4, e para o terceiro clasificado unha tarxeta PSN de 20 euros. No torneo de GT Sports poderán participar 32 persoas, e os premios deste torneo serán un Thrustmaster T-GT para o primeiro, unha tarxeta PSN de 50 euros para o segundo, e unha tarxeta PSN de 20 euros para o terceiro.

ENTRADAS PARA DOMINGO (GRADA)

ENTRADAS PARA TORNEO DE GT SPORT

ENTRADAS PARA CLASH ROYALE

TORNEOS ICC GAMERS & ICC eSPORTS

Calendario ICC Week 2017
Share This